Саломапляценне Беларусі  ўключана ў спіс нематэрыяльнай культурнай спадчыны ЮНЭСКА. Беларускія саламяныя вырабы не маюць аналагаў у свеце і сведчаць аб унікальных здольнасцях нашага народу. Прабабулі ўпрыгожвалі сябе, свае пакоі і хаты саламянымі тварэннямі. Рэчы першай неабходнасці таксама рабілі  з прыроднага матэрыялу – плялі боты і капялюшы,  рабілі кошыкі і  люлькі для дзяцей, накрывалі дах хаты саломаю.

І сення саламяныя сувеніры можна  набыць на кірмашах, фэстах, выставах і крамах у майстроў, якія захоўваюць традыцыі нашых продкаў і працягваюць удасканальваць нашую нацыянальную каштоўнасць. 

Мы прапануем  пазнаёміцца з  носьбітам народнага рамяства, аўтаркай  арыгінальных сюжэтаў  і твораў з саломкі - Аленай Грынь. Яна пераняла вопыт саломапляцення ад  сваёй роднай бабулі і маці. З цягам часу яе дзіцячае захапленне стала прафесійнай дзейнасцю і стылем жыцця . Алена - ўдзельніца і пераможца шматлікіх нацыянальных і міжнародных конкурсаў і выстаў, сябра Саюза майстроў народнай творчасці Беларусі. Яе творы ўпрыгожваюць розныя  культурныя прасторы ў нашай краіне.

На майстар класе Алена падзеліцца  тэхнікамі саломапляцення, навучыць рабіць простыя і вельмі прыгожыя навагоднія і калядныя цацкі, абярэгі ці забаўкі. 

Майстар клас будзе праходзіць у археалагічным комплексе на рацэ Менка “Стары Менск”, гістарычным месцы, дзе бэры пачатак гісторыя нашай сталіцы.  На аграсядзібе ў в. Гарадзішча звыш 500 экспанатаў Х- ХІ стагоддзяў, адзіны ў Беларусі макет Менскага замка ХІ ст,  безліч найцікавейшых прадметаў і каштоўнасцей. Мы наведаем дзве экспазіцыйныя залы і замчышча, пройдземся шляхамі Усяслава Чарадзея  і ўспомнім урокі гісторыі.

Фота з сайта сядзібы https://starymensk.by

Кошт:

*кошт індывідуальнага/карпаратыўнага падарожжа разлічваецца па запыце.